Hongian Ffest 2026

BMC Hongian Ffest a’r Daith – Bethesda 2026

Nôl yn 2015 lansiwyd prosiect dringo ieuenctid Hongian mewn dwy ardal chwarelyddol – Blaenau Ffestiniog a Bethesda. Ers hynny mae’r prosiect wedi tyfu’n ŵyl ddringo ac awyr agored ddwyieithog: BMC Hongian Ffest, wedi’i gwreiddio yn nhirweddau llechi gogledd Cymru.

Eleni mae Hongian yn mynd ar daith.

Yn 2026 bydd yr ŵyl yn teithio i Fethesda, gan ddychwelyd i un o’r llefydd lle dechreuodd y stori. Wedi’i hamgylchynu gan dirweddau llechi Dyffryn Ogwen a diwylliant dringo cryf yn yr ardal, mae’n lle gwych ar gyfer penwythnos o ddringo a bod allan yn y bryniau efo’n gilydd.

BMC Hongian Ffest yw’r unig ŵyl ddringo ac awyr agored ddwyieithog yng Nghymru, ac rydym yn edrych ymlaen yn fawr at ddod â Hongian i Besda.

Beth Sy’n Digwydd

Rydyn ni’n rhoi at ei gilydd penwythnos o ddringo, cerddoriaeth a chwmni da ym Methesda a’r ardal o’i gwmpas. Mae’r rhaglen lawn dal yn cael ei threfnu, ond dyma flas o beth sydd ar y gweill.

• Sesiynau dringo traddodiadol gyda Calum Muskett
• Dringo a boldro ieuenctid gyda , Si Panton ac Osian Parry
• Diwrnodau sgramblo i ieuenctid ac oedolion
• Rhedeg llwybrau gyda Kathryn Roberts a Calum Muskett
• Dringo chwaraeon, bouldro a sesiynau dringo i’r teulu

Bydd hefyd ffilmiau, sgyrsiau gan ddringwyr lleol, stondinau, a set gerddoriaeth acwstig gan Lewis Perrin, gyda cerddoriaeth gyda’r nos gan Elemental Rwts. Mwy o fanylion i ddod wrth i’r rhaglen gael ei chwblhau.

Gan y Gymuned, i Bawb

Mae Hongian Ffest yn ŵyl nid-er-elw sy’n cael ei rhedeg gan wirfoddolwyr, gyda chefnogaeth gan y British Mountaineering Council (BMC) a phartneriaid lleol.

Mae’r sesiynau’n fforddiadwy ac yn groesawgar, gyda’r nod o gael mwy o bobl allan ar y graig ac yn y mynyddoedd.

Ymunwch â Ni ym Methesda

Rydyn ni’n edrych ymlaen at ddod â Hongian yn ôl i Besda a dathlu’r diwylliant dringo sydd wedi helpu siapio’r prosiect.

Rydyn ni’n dod adra, Pesda baby.

Os hoffech chi gymryd rhan, helpu rhedeg sesiynau neu wirfoddoli, cysylltwch â ni.

Datganiad Cyfranogiad y BMC:

Trwy archebu lle ar sesiwn yn Hongian Ffest, rydych yn derbyn cyfrifoldeb am eich gweithredoedd eich hun, yn unol â datganiad y BMC:

“Mae’r BMC yn cydnabod bod dringo, cerdded a mynydda yn weithgareddau sydd â pherygl o anaf personol neu farwolaeth. Dylai’r rhai sy’n cymryd rhan fod yn ymwybodol o’r risgiau hyn, eu derbyn, a bod yn gyfrifol am eu gweithredoedd eu hunain.”

Dylai cyfranogwyr gydnabod, hyd yn oed pan fo arferion da yn cael eu dilyn, bod risg gynhenid yn parhau yn y gweithgareddau hyn.

Mae’r trefnwyr yn cadw’r hawl i ddod â sesiwn i ben yn gynnar neu ofyn i rywun adael os ydynt yn rhoi eu hunain neu eraill mewn perygl. Mae hyn hefyd yn berthnasol i unrhyw un sy’n ymddwyn mewn ffordd aflonyddgar neu wahaniaethol.